Bandari Watoa Msaada Wa Vifaa Vya Afya Vyenye Thamani Ya Shilingi Milioni 33.47

Imewekwa Kwenye: June 3rd, 2023

Uongozi wa bandari wilayani Kyela umekabidhi vifaa vya afya kwa Mheshimiwa Mkuu wa wilaya tarehe 02/06/2023, vifaa vilivyokabidhiwa ni pamoja na meza 15, vitanda 15, magodoro 15 na kufanya thamani ya shilingi milioni 33.47.

Akizungumza kabla ya kukabidhiwa misaada hiyo, Mkuu wa wilaya ya Kyela Mhe. Josephine K. Manase amesema,

Anapenda kutoa shukrani kwa Mhe. Rais Dkt. Samia Suluhu Hassan kwa kuikumbuka wilaya ya Kyela na kuwasogezea karibu huduma za afya wananchi, ambapo miradi mingi ya Afya imeendelea kutekelezwa, ikiwemo ujenzi wa zahanati na vituo vya afya.

Hivyo ametoa pongezi nyingi kwa uongozi wa bandari kwa kumuunga mkono Mhe. Rais kwa kutoa misaada ambayo inaenda kuwasaidia wa Tanzania.

"Viongozi wa bandari mmeona jitihada za kuwasogezea huduma za afya wananchi, kazi inayofanywa na Mhe. Rais. Dkt . Samia Suluhu Hassan ndio maana mmeamua kumuunga mkono Mhe.Rais niwapongeze kwa hilo" amesema Mhe. Manase.

Aidha amewaomba viongozi wa bandari kuendelea kushirikiana na serikali katika kukamilisha miradi  tunayoitekeleza, ikiwemo mradi mkubwa wa jengo la mama na mtoto katika hospitali ya wilaya.

Awali meneja wa bandari wilayani Kyela ndugu Manga Gassaya amesema, lengo kubwa la kutoa msaada huu ni kuunga mkono jitihada za serikali katika kuwasaidia wananchi, pamoja na kutimiza takwa la kisheria la kurudisha fadhira kwa wananchi kwa huduma wanazozitoa "CSR".

Nae Mkurugenzi Mtendaji wa Halmashauri ya wilaya ya Kyela Ndugu Ezekiel H. Magehema, ametoa shukrani zake za dhati kwa Mheshimiwa Rais. Dkt. Samia Suluhu Hassan kwani pamoja na kutoa fedha nyingi zinazotekeleza miradi hapa wilayani ususani katika idara ya afya, pia kwa sasa kuna mpango wa kufanya ukarabati wa Hospitali ya wilaya ya Kyela.