Halmashauri Ya wilaya Ya Kyela Yaungana Na Wadau Wa Mazingira Katika Kufanya Usafi Hapa Wilayani

Imewekwa Kwenye: April 19th, 2023

Wataalam wa Afya, Maendeleo ya jamii na Mazingira kutoka Halmashauri ya wilaya ya Kyela kwa kushirikiana na Barozi wa mazingira Ndugu Nestory Mushi kutoka Ofisi ya Makamu wa Rais Muungano na Mazingira, Asasi zinazojishughulisha na usafi wa Mazingira IECA kutoka Ileje, EMEDO, ARENA RECYCLING kutoka Jiji la Mwanza, Wamefanya usafi wa mazingira  katika  kata mbalimbali za Wilaya ya Kyela.

Kata ya Matema, kata ya Njisi, Kata ya Mikoroshini ni mojawapo wa kata zilizopitiwa na zoezi hilo lililoanza kuanzia tarehe 17/04/2023 na litahitimishwa tarehe 19/04/2023 kwa kufanya usafi katika kata ya Mwanganyanga.

Akitoa elimu ya usafi wa mazingira kwa wananchi wa kata ya Mikoroshini Mhadhiri msaidizi kutoka Chuo Kikuu Cha Dar es salaam Ndugu Bahati Mayoma amesema, taka zote hizi zimeundwa na kemikali mbalimbali ambazo si rafiki kwa afya ya binadamu.

Hivyo lengo la kufanya usafi huu ni pamoja na kutoa Elimu ya kuepuka jinsi ya kutotumia  bidhaa za plastiki pale inapowezekana.

Aidha amewataka wananchi kudhibiti taka kutoka katika makazi yetu ili kuisaidia Serikali kutotumia gharama kubwa kuondoa taka mtaani, na badala yake tunaweza kuzitunza taka hizo, hasa zile za plastiki na kuzigeuza kuwa fulsa ya kutengeneza bidhaa mpya.

"Tunafanya usafi huu pamoja na kutafiti ni aina gani za taka ambazo zinachafua mazingira kwa kiasi kikubwa kisha tutakuja na majibu kwa serikali na utatuzi wa tatizo la taka hizo kwa wananchi" amesema Mayoma.

Pamoja na hayo ndugu Mayoma amesema, kwa hapa Tanzania tafiti kadhaa zimeonesha kuwa taka za plastiki ikiwemo nyavu zilizotelekewa zimetapakaa katika maeneo mbalimbali ikiwa ni pamoja na fukwe za Bahari, Maziwa na Mito ambapo baadhi ya viumbe wakiwemo samaki, vimethibitika kuwa na vipande vidogo vidogo vya plastiki (microplastics) katika matumbo yao.

Kadhalika taka za plastiki zimethibitika kuwa chanzo cha kuenea kwa vimelea vinavyoweza kupelekea usugu wa dawa (AMR) n.k.  Kwa upande wa nyavu zilizotelekezwa, zimeendelea kuzonga na kunasa samaki bila uangalizi wa binadamu (Ghost fishing).

Hali hii siyo tu inatishia uendelevu wa sekta ya uvuvi, uchumi wa jamii, na usalama wa chakula kitokanacho na protini ya samaki ambayo hutegemewa zaidi na jamii inayozunguka maziwa makuu pamoja na Bahari, bali pia taka hizi zinadhoofisha malengo mtambuka ya mchango chanya unaotakana na uchumi wa bluu pamoja na mapambano dhidi ya mabadiliko ya tabia nchi.

Zoezi bado linaendelea hadi tarehe 20/04/2023.

Mwisho.