Kaimu Mtendaji Mkuu Wa Mamlaka Ya Mji Mdogo Wa Kyela Apongezwa Kwa Kuongeza Nguvu Ya Ukusanyaji Wa Mapato

Imewekwa Kwenye: June 5th, 2021

Mwenyekiti wa Baraza la mji mdogo wa Kyela Mhe. Emmanuel A. Bongo amempongeza Kaimu Mtendaji Mkuu wa Mji Mdogo wa Mamlaka Kyela ndugu Gerald Mlelwa, kwa jitihada zake za ukusanyaji wa mapato tangu ameanza kukaimu nafasi hiyo. Pongezi hizo zimetolewa katika kikao cha baraza la Mamlaka ya mji mdogo Kyela lililofanyika tarehe 04/06/2021 katika ukumbi wa mamlaka hiyo hapa wilayani Kyela.

Pamoja na pongezi hizo Mheshimiwa mwenyekiti wa Baraza hilo aliendelea kwa kusema kwamba, kwasasa mamalaka imejipanga katika ununuzi wa Trekta litakalosaidia katika shughuli za uzoaji wa takataka mitaani, ili kuongeza jitihada za kuufanya mji wa Kyela kuwa msafi.

Pia amesema anafurahishwa na umoja uliopo baina ya ofisi ya Mheshimiwa Mbunge, ofisi ya Mkuu wa wilaya ya Kyela, Mwenyekiti wa halmashauri ya wilaya ya Kyela pamoja na uongozi mzima wa Mkurugenzi mtendaji wa halmashauri ya wilaya ya Kyela ndugu Ezekiel H. Magehema. Kwani wamekuwa mstari wa mbele katika kuisaidia mamlaka ya mji mdogo wa Kyela kusonga mbele kimaendeleo.

Aidha Mheshimiwa Emmanuel Bongo ametumia nafasi hiyo kuwaonya baadhi ya wenyeviti wa vitongoji, wanaojisahau kufanya kazi ili kuwatumikia wananchi na kuanza kuleta vurugu, kwa manufaa ya kujiandalia mazingira ya kuja kugombea nafasi za udawani. Amesema wakati huu ni wakati wa kufanya kazi tulizoomba ili kuwahudumia wananchi na kuwaletea maendeleo yao. Pia amewataka wenyeviti hao kwenda kutoa elimu ya ukusanyaji wa ushuru kwa wananchi wao na kuifanya kazi hiyo kuwa nyepesi na mafanikio makubwa kwa mamlaka.

Hata hivyo Kaimu Mtendaji Mkuu wa mamlaka ya mji mdogo Kyela ndugu Gerald Mlelwa, amezipokea kwa furaha pongezi hizo, na kusema kama ushirikiano baina na viongozi utaendelea hivi, basi atazidi kumuomba Mungu ili amzidishie nguvu ya ukusanyaji wa mapato na kuifanya mamlaka hiyo kuwa juu kimapato ukilinganisha na wakati uliopita. 

Mwisho Mheshimiwa mwenyekiti alimuomba Kaimu Mtendaji wa mamlaka ya mji mdogo wa Kyela, kulipa madeni yote ya mwaka 20/21 ili katika mwaka wa fedha 21/22 kusiwe na madeni ya nyuma katika mamlaka hiyo .