Mkuu Wa Mkoa Wa Mbeya Ashangazwa Uwezo Wa Timu Nzuri Za Mpira Zilizopo Wilayani Kyela

Imewekwa Kwenye: August 11th, 2022

Mkuu wa Mkoa wa Mbeya Mhe. Juma Homera ameshangazwa na uwepo na timu za mpira ambazo zinauwezo mkubwa wa kucheza mpira zilizopo wilayani Kyela hadi kuwa tishio kwa timu kubwa.

Mheshimiwa Mkuu wa Mkoa ameyasema haya tarehe 10/08/2022, wakati akifunga mashindano aliyoyaandaa mwenyewe yakitambulika kwa jina la Mbeya Pre season Samia Cup, mashindano yaliyofanyika wilayani Kyela yakishirikisha timu za Ihefu Fc, Kyela Combine, Can Gold, Tanzania Prison, Mbeya city pamoja na Rungwe Dc.

Akiongea kabla ya kufunga mashindano hayo, Mkuu wa Mkoa Mheshimiwa Juma Homera amesema, wilaya ya Kyela ina timu nzuri sana za mpira ila wananchi wameshindwa kuzisaidia timu hizo ili ziweze kufika mbali. Amesema ili kuzisaidia timu hizo atafanya mazungumzo na Mbunge wa jimbo la Kyela ndugu Ally Kinanase, kwa pamoja waweze kuinua timu moja ya mpira wilayani Kyela ili iweze kufika ngazi ya ligi kuu.

Aidha amewataka wananchi wa wilaya ya Kyela kuwa na muamko wa kuzisaidia timu za Kyela kwani timu hizi zimekuwa na uwezo mkubwa katika kucheza mpira lakini zimekosa usaidizi na kufa ikiwemo timu nzuri ya Boma Fc ambayo ilikufa baada ya kukosa usaidizi.

Hata hivyo Mheshimiwa Mkuu wa Mkoa ametoa pongezi kwa viongozi wote ambao wameziwezesha timu shiriki, kushiriki mashindano hayo kuanzia mwanzo hadi mwisho wa mashindano, aidha amesema lengo kubwa la mashindano haya ni kutaka kufanya maandalizi kwa timu za Mbeya ambazo zinakwenda kushindana katika msimu ujao wa ligi kuu.

Timu ya Kyela Combine ikiwa katika furaha ya kufurahia ushindi wa nafasi ya kwanza katika mashindano ya Mbeya Pre season Samia Cup yaliyofanyika hapa wilayani Kyela.

Akiongea kwa niaba ya wananchi wa wilaya ya Kyela, Mkuu wa wilaya ya Kyela Mhe. Ismail Mlawa amemwomba Mheshimiwa Mkuu wa Mkoa kuipa nafasi wilaya ya Kyela ili mashindano haya yafanyike tena katika wilaya hii ifikapo mwakani.

Nae Afisa Michezo wa Mkoa ndugu Mfugale amesema mashindano ya Mbeya Pre season Samia Cup, yalianzishwa na Mheshimiwa Mkuu wa Mkoa wa Mbeya kuanzia tarehe 04/08/2022 hadi tarehe 10/08/2022 yakiwa na lengo la kuziandaa timu zote za Mkoa wa Mbeya ambazo zinaenda kushindana katika ligi kuu ya Tanzania, lakini pia kuzipa uzoefu timu ndogo na kuweza kuibua vipaji kwa wachezaji chipukizi.

Katika mashindano ya Mbeya Pre season Samia cup, timu ya Kyela Combine imeibuka mshindi wa Kwanza baada ya kuicharaza timu ya Ihefu Fc kwa goli 1. Hata hivyo timu ya Ihefu fc ilishika nafasi ya 2 ikifuatiwa na timu ya Rungwe Dc.

Mwisho.