Mkuu Wa Wilaya Ya Kyela Azindua Mabweni 2 Bwalo 1 La Chakula Katika Shule Ya Sekondari Kafundo

Imewekwa Kwenye: July 30th, 2022

Mkuu wa wilaya ya Kyela Mhe. Ismail Mlawa Akizindua Mabweni 2 na bwalo 1 katika shule ya sekondari Kafundo iliyopo kata ya Ipinda wilayani Kyela.

Mkuu wa Wilaya ya Kyela Mheshimiwa Ismail Mlawa, amezindua mabweni 2 pamoja na bwalo 1 la chakula kwa niaba ya  Mkuu wa Mkoa wa Mbeya Mheshimiwa Juma Homera, katika shule ya sekondari Kafundo tarehe 29/07/2022.

Akizindua mabweni hayo 2 pamoja na bwalo 1 la chakula, Mheshimiwa Mkuu wa wilaya ametoa pongezi zake za dhati kwa wadau wa maendeleo "COCOA FOR SCHOOLS" pamoja na wananchi ambao wameshirikiana kwa pamoja katika kujenga mabweni hayo pamoja na bwalo la chakula. Amesema ujenzi wa mabweni ni msaada mkubwa hasa kwa wanafunzi wa kike, wale wanaotoka mbali na eneo la shule.

Picha ya Mabweni yaliyozinduliwa katika shule ya sekondari Kafundo

Aidha Mheshimiwa mkuu wa wilaya amewataka wanafunzi kukazana kusoma kwa bidii na kuongeza ufaulu kwani lengo la wilaya ni kuwa miongoni mwa wilaya 10 bora katika ufaulu Kitaifa.

Amesema, ili kufikia ufaulu huo wazazi hawana budi kutoa chakula kwa watoto wao wawapo shuleni ili wanafunzi wapate nguvu za kusoma. Hata hivyo Mheshimiwa Mkuu wa Wilaya amewataka wanafunzi kusoma kwa bidii masomo ya sayansi ili nchi yetu iwe na wanasayansi wengi kwa maendeleo ya nchi.

Akitoa taarifa yake kwa Mheshimiwa Mkuu wa wilaya ya Kyela, Mkuu wa shule ya sekondari Kafundo Jenny A. Nombo amesema, pamoja na msaada wa wadau wa maendeleo, Pia anapenda kutoa shukrani za dhati kwa serikali ya Jamhuri ya Muungano wa Tanzania inayoongozwa na Mheshimiwa Rais Samia Suluhu Hassan kwa kutoa shilingi 25,000,000/= ambazo zimesaidia ujenzi wa vyumba 2 vya madarasa kwa ajili ya kuanzisha tahasusi za Sayansi katika kidato cha tano na sita.

Sambamba na uzinduzi wa mabweni hayo Mheshimuwa Mkuu wa Wilaya ya Kyela alipata fulsa ya uzinduzi wa vyumba 13 vya madarasa katika shule ya msingi Nkuyu iliyopo kata ya Nkuyu hapa wilayani Kyela. Madarasa yaliyojengwa na wadau hao wa maendeleo pamoja na nguvu za wananchi.

Akizungumza kwa niaba ya wadau wa maendeleo yaani "COCOA FOR SCHOOLS" Mr. Fons amesema lengo la kufadhiri ujenzi huu ni pamoja na kutaka kuona kila mwalimu anakuwa na darasa lake la kufundisha lakini pia kuongeza ufaulu kwa wanafunzi. Na hata hivyo kwa sasa wanampango wa kujenga madrasa 141 katika wilaya ya Kyela na wilaya ya Rungwe.

Pamoja na hayo Mheshimiwa Mkuu wa Wilaya aliendelea kutoa hamasa kwa wananchi kujitokeza ili kuhesabiwa katika siku ya Sensa ya watu na makazi itakayofanyika tarehe 23/08/2022.

Bwalo la chakula katika shule ya sekondari Kafundo.

Mwisho.