SERIKALI YAWAPUNGUZIA WANANCHI ADHA YA ELIMU KWA KUJENGA SHULE KARIBU YAO

Imewekwa Kwenye: June 27th, 2025

SERIKALI YAWAPUNGUZIA WANANCHI ADHA YA ELIMU KWA KUJENGA SHULE KARIBU YAO

Serikali ya Jamhuri ya Muungano wa Tanzania imeendelea kuonyesha dhamira ya dhati katika kuinua sekta ya elimu nchini kwa kujenga Shule ya Sekondari Ibanda kwa gharama ya Shilingi milioni 582. Ujenzi wa shule hiyo umeleta matumaini mapya kwa wakazi wa eneo la Ibanda na maeneo ya jirani, ambao kwa muda mrefu wamekuwa wakikumbana na changamoto ya umbali mrefu wa kufuata elimu ya sekondari.

Kabla ya kujengwa kwa shule hiyo, wanafunzi walilazimika kusafiri zaidi ya kilomita 9 kila siku kwenda Shule ya Sekondari Itope. Safari hiyo ilikuwa kikwazo kikubwa kwa watoto wengi, hasa wasichana, na mara kadhaa ilisababisha utoro, uchovu, na kushuka kwa ufaulu. Kupitia shule hii mpya, changamoto hizo sasa zimepatiwa suluhisho la kudumu, na wazazi wameanza kuona mwanga wa matumaini kwa watoto wao.

Shule ya Sekondari Ibanda ina miundombinu ya kisasa inayoendana na mahitaji ya elimu ya leo. Ina jumla ya madarasa 8 yaliyokamilika kwa viwango vya juu, jengo la maktaba litakalowasaidia wanafunzi kupanua maarifa yao, pamoja na jengo la Tehama kwa ajili ya kukuza ujuzi wa teknolojia. Pia kuna ofisi mbili za walimu zinazowezesha shughuli za kiutawala kufanyika kwa ufanisi zaidi.

Kwa upande wa huduma za kijamii na usafi wa mazingira, shule hiyo ina matundu 10 ya vyoo matano kwa wavulana na matano kwa wasichana yaliyojengwa kwa kuzingatia viwango vya kiafya na usalama. Miundombinu hii yote inadhihirisha dhamira ya serikali sio tu ya kuongeza upatikanaji wa elimu, bali pia kuhakikisha mazingira bora na rafiki kwa mtoto wa Kitanzania kujifunzia.