Tuilinde Miradi Inayotekelezwa Na Serikali-Albert Chalamila

Imewekwa Kwenye: February 25th, 2021

Haya yamezungumzwa na Mkuu wa mkoa wa Mbeya Mhe. Albert Chalamila alipokuwa akizungumza na wananchi wa Kyela katika ziara yake ya kutembelea miradi ya maendeleo, ziara iliyofanyika katika kata za Ipinda, Matema na Mababu hapa wilayani Kyela tarehe 24.02.2021.

Akizungumza na wananchi katika mradi wa maji uliopo kata ya Mababu wilayani Kyela Mhe. Mkuu wa Mkoa amesema ni vizuri wananchi wakawa ni walinzi na kuipa thamani miradi hii yote inayotekelezwa na serikali yao, ikiwa ni pamoja na kuitunza miundo mbinu yote ya miradi ya maji ambayo inatekelezwa katika wilaya ya Kyela.

Pia Mkuu wa mkoa amewataka wananchi kuchangia miradi inayoletwa na serikali ili kuifanya miradi hiyo kutekelezwa kwa haraka, aliongeza kwa kusema michango si lazima iwe fedha, bali hata kutoa baadhi ya maeneo ya kijiji ili kurusu miradi kutekelezeka .

Akitoa taarifa ya utekelezaji wa miradi ya maji, meneja wa maji Kyela Eng. Tanu Deule amesema; miradi hii ya maji hadi kukamilika kwake itatumia kiasi cha shilingi 29,547,000/= kwa mradi wa maji wa Matema katika vitongoji vya Ibungu na Lyulilo pia shilingi 344,918,750 kwa mradi wa maji wa Mababu. Na kwa mradi wa maji wa Mababu hadi sasa kiasi  zaidi ya shilingi 90,000,000/= zimeshatumika. 

Aidha Mkuu wa wilaya ya Kyela Mhe. Claudia U. Kitta alitoa pongezi kwa wananchi wa Lyulilo kwa kupata maji safi na salama kwani  ni kwa takribani miaka 10, wananchi hao hawajapata maji ya bomba. Pia alitoa shukrani, pongezi kwa  kazi kubwa inayofanywa na serikali, Kwani Kyela imependelewa sana kwa kuletewa miradi mingi ya maendeleo. Aidha aliwasii wananchi kuilinda na kuithamini miradi yote ya maendeleo inayotekelezwa na serikali yetu.

Mwisho Mhe. Mkuu wa mkoa alipata nafasi ya kutembelea ujenzi wa mabweni matatu (3 ) na bwalo moja (1) la chakula , yanayojengwa katika shule ya sekondari Kafundo iliyopo kata ya Ipinda hapa wilayani Kyela, Huku akiwahimiza wazazi kutoa huduma ya chakula kwa wanafunzi wao shuleni, ili kuwafanya kuwa na afya njema na kuwa na ufikiri mzuri katika masomo yao wawapo darasani.

Mkuu wa mkoa wa Mbeya (kulia kavaa kofia) akiwa na Mkurugenzi mtendaji wa halmashauri ya wilaya ya Kyela ndugu. Ezekiel Magehema (kushoto), akiwa na mwenyekiti wa halmashauri ya wilaya ya Kyela Mhe. Katule Kingamkono(nyuma ya mkurugenzi) pamoja na viongozi wengine wakitembelea ujenzi wa mabweni katika shule ya sekondari Kafundo iliyopo kata ya Ipinda hapa wilayani Kyela.

IMETOLEWA NA;

OFISI YA HABARI NA MAWASILIANO

KYELA.