Wauguzi Wilayani Kyela Wakumbushana Utoaji Wa Huduma Bora Kwa Wagonjwa

Imewekwa Kwenye: May 19th, 2024

Wauguzi wa Halmashauri ya wilaya ya Kyela wameadhimisha siku ya wauguzi duniani tarehe 18/05/2024, kwa kufanya shughuli mbalimbali ikiwemo kuwatembelea wagonjwa wodini, pamoja na kutoa misaada mbalimbali kwa wagonjwa waliolazwa katika kituo cha afya kilichopo kata ya Ipinda wilayani Kyela.

Akizungumza katika hafla hiyo Mkuu wa Idara ya Afya, Ustawi wa jamii na Lishe (W) Dkt. Saumu Kumbisaga amewasisitiza  wauguzi hao kuendelea kutoa huduma bora kwa wananchi.

Aidha Dkt. Kumbisaga amewataka wauguzi kujitambua kujithamini, kwani wao wana mchango mkubwa katika kuhakikisha kuwa mgonjwa anakuwa na afya njema na usalama pale awapo hospitalini hadi anavyoruhusiwa.

Vilevile Dkt. Saumu Kumbisaga amewataka Wauguzi hao kuwa wamoja, kuheshimiana na kushirikiana katika shughuli za afya, ili kufikia malengo waliyojiwekea kama Idara ya  ikiwemo kuwa ni mfano wa kuigwa kwa wilaya nyingine.

Mwisho Dkt. Saumu Kumbisaga amewasisitiza wauguzi kutumia lugha za faraja kwa wagonjwa ili kuepuka kujenga taswira mbaya kwa wauguzi pia kumpa faraja mgonjwa.