Wilaya Ya Kyela Yafanya Maadhimisho Ya Kilele Cha Siku Ya Mazingira Duniani

Imewekwa Kwenye: June 6th, 2023

Maadhimisho ya siku ya mazingira yafanyika wilayani Kyela tarehe 05/06/2923 kwa upandaji wa miti katika shule ya msingi Sama.

Maadhimisho hayo yamehudhuriwa na viongozi wa NEMC kanda za juu kusini, wakuu wa idara na vitengo mbalimbali, wadau wa mazingira pamoja na wananchi.

Akizungumza wakati akitoa hotuba yake kwa niaba ya Mkuu wa wilaya ya Kyela, Afisa tarafa ya Unyakyusa ndugu Kheri L. William amesema;

Lengo kuu la Maadhimisho ya siku ya Mazingira mwaka huu ni kufanya tathmini ya Mazingira, kubaini changamoto zinazoikabili Sekta ya Mazingira na kutoa mwelekeo wa kupambambana na changamoto hizo ili kuwa na Mazingira bora na endelevu, tukiongozwa na kauli mbiu ya mwaka ya mwaka huu Kitaifa ″Pinga uchafuzi wa mazingira unaotokana na taka za plastiki”

Aidha amesema Halmashauri ya Kyela imepanda jumla ya miti 70,700, katika maeneo mbalimbali kama shuleni, vijiji, Zahanati na katika vituo vya afya. Pia usafi umefanyika kwenye maeneo ya mifereji, masoko na fuke ya Ziwa Nyasa.

Shughuli hizo ziliambatana na uhamasishaji wa wananchi katika masuala ya uhifadhi na usafishaji wa mazingira yanayowazunguka.

Pamoja na hayo Ndugu Kher L. William amebainisha athari za mabadiliko ya tabia ya nchi kama ilivyo kwa nchi nzima na dunia nzima ambazo asilimia kubwa zimetokana na shughuli za kibinadamu.

Amesema  Athari hizo huambatana na milipuko ya magonjwa ya mara kwa mara kwa binadamu, mifugo na kilimo, kuharibika kwa mifumo ya ikologia inayotokana na kuongezeka kwa hali ya joto, kuongozeka kwa maji ya Ziwa/bahari.

Awali Kaimu meneja kanda za juu kusini "NEMC", ndugu Milton Patrick Mponda amesema, Serikali imepiga marufuku matumizi ya mifuko ya plastiki, baada ya kufanya tafiti na kujiridhisha kwamba, kuna hasara nyingi za matumizi ya mifuko hiyo kuliko faida zake.

Hivyo hairuhusiwi kutumia bidha hizi mahali popote, iwe dukani, sokoni au sehemu yoyote ya mikusanyiko ili kulinda mazingira.

Pamoja na hayo amesema nchi yetu imetunga sheria kali amabazo zinazuia utengenezaji, uingizaji, umiliki, na usambazaji wa bidhaa hizo ikiwa ni kwa lengo la kulinda mazingira na vyanzo vya maji.

Mwisho Wananchi wa Wilaya ya Kyela yatupasa kuunga mkono juhudi zinazofanywa na Serikali ya Awamu ya Sita za kuifanya nchi yetu kuwa nchi ya kuhimiza usafi na utunzaji wa mazingira.