Vijana 185 Wahitimu Mafunzo Ya Mgambo Kyela

Posted on: November 29th, 2020

Mkuu wa wilaya ya Kyela Mhe.Claudia U. Kitta(katikati)akiwa na viongozi wengine pamoja na vijana waliohitimu mafunzo ya mgambo katika picha ya pamoja tarehe 28/11/2020.

Vijana 185 kati ya vijana 208 waliojiunga na mafunzo ya mgambo, hapa wilayani Kyela wamehitimu mafunzo yao tarehe 28/11/2020 katika sherehe za ufangaji mafunzo zilizofanyika katika kata ya Mababu hapa wilayani Kyela, Ikiwa ni pamoja na wanafunzi 23 wameshindwa kuhitimu kwa sababu mbalimbali ikiwemo utoro. 

Akifunga mafunzo hayo yaliyoanza tarehe 20/07/2020 na kumalizika tarehe 28/11/2028, Mkuu wa wilaya ya Kyela Mhe. Claudia U. Kitta amewataka vijana hao kutumia elimu walioipata katika kujitafutia maisha bora, kwani msingi wa mafanikio duniani ni kufanya kazi kwa bidii na maarifa. 

Aidha amewataka vijana kuachana na visingizio kuwa hakuna ajira, wakati serikali imetengeza miundo mbinu wezeshi katika kufanya shughuli za kujiajiri. Amesema uwepo wa barabara za rami, meli za mizigo na abiria ni fulsa tosha ya vijana kujiajiri wenyewe, huku ajira za serikali zikiendelea kutolewa. 

Aidha amesema, Serikali haijawasahau vijana hata kidogo kwani imeagiza kila halmashauri nchini kutenga 10% ya mapato kwa makundi ya wanawake, walemavu na vijana, ambapo 4% ya asilimia hizo imetengwa kwa vijana. Cha kufanya ni vijana kujitambua na kujiunga katika vikundi na kupata mkopo huo. 

Mkuu wa wilaya alitoa pongezi kwa vijana waliomaliza mafunzo yao, kwani wakiwa katika mafunzo hayo, vijana hao waliweza kujifunza mambo mengi ikiwemo ukakamavu, kuepukana na vitendo vya rushwa, kutoa huduma ya kwanza mbinu za kivita pamoja na ujasiliamari.

Pia waliweza  kufanya kazi za kijamii ikiwemo kufanya usafi wa mazingira, kujitolea damu pamoja na kuhakikisha amani inapatikana katika kipindi chote cha uchaguzi.

Kwa upande wao wahitimu wa mafunzo ya mgambo, walisema katika mafunzo yao walipata changamoto ya mavazi, Na pia walimwomba mkuu wa wilaya kuwambuka pale zinapojitokeza kazi ili wao wawe mstari wa mbele kwani wapo tayari wakati wowote kwa ujenzi wa Taifa.