Mauaji Wilayani Kyela Yakomeshwe Mara Moja-Mhe. Claudia U. kitta

Imewekwa Kwenye: August 27th, 2019

Kauli hiyo imezungumzwa na mkuu wa wilaya ya Kyela mhe. Claudia Kitta katika mkutano wa baraza la madiwanai, lililofanyika siku ya jumanne tarehe 27/08/2019, mkutano huo umefanyika katika ukumbi wa halmashauri ya wilaya ya Kyela.

Mkuu wa wilaya ameagiza watendaji na wananchi wote kushirikiana kwa pamoja ili kufichua wahalifu wanaosababisha mauaji kwa raia katika wilaya ya Kyela, jambo hili linatishia amani kwa raia  kwani mpaka sasa vifo vya watu watano vimeripotiwa kutoka vijiji vya Njisi, Nkuyu na Ipinda.

Aidha alisema vijiji vyote vinatakiwa kupambana na wahalifu  kwa nguvu zote  ili kukomesha vitendo hivyo vya kikatili mara moja. Pia mwenyekiti wa baraza la madiwani  Dr.Hunter Mwakifuna amewataka madiwani  kushirikiana na vyombo vya ulinzi na usalama, katika zoezi zima la kuwasaka wahalifu ili kuwachukulia hatua za kisheria mara moja.

Aidha kwa vyombo vya ulinzi na usalama, kwa  kushirikiana na viongozi wa wilaya wameombwa kupambana kwa nguvu zote  kuwatafuta wahalifu ili kuwakamata na kuwafikisha mbele ya  vyombo vya kisheria.

Baraza la madiwani limefanyika ili kujadili na kutoa tathimini ya mafanikio yaliyojitokeza katika mwaka wa bajeti 2018/2019. Pia baraza hilo limejipanga kushughulikia changamoto  zote zinazojitokeza katika kuleta maendeleo ndani ya wilaya ya Kyela.