DC KYELA AONGOZA KIKAO KAZI NA WATENDAJI WA KATA, WENYEVITI WA VIJIJI NA VITONGOJI

Imewekwa Kwenye: November 28th, 2025

Mkuu wa Wilaya ya Kyela, Mhe. Josephine Manase, ameongoza kikao kazi na Watendaji wa Kata, Wenyeviti wa Vijiji na Vitongoji kilichofanyika tarehe 28 Novemba 2025 katika ukumbi mkubwa wa mikutano wa Halmashauri ya Wilaya ya Kyela.

Akizungumza kwenye kikao hicho, Mhe. Manase amesema kuwa Serikali ya Jamhuri ya Muungano wa Tanzania imejikita katika kuwaletea wananchi maendeleo, hivyo amewataka Watendaji wa Kata kusimamia ipasavyo shughuli zote za maendeleo katika maeneo yao. Aidha, amesisitiza umuhimu wa kuwafahamisha wananchi hatua mbalimbali za utekelezaji wa miradi ya maendeleo ili kuongeza uwazi na ushirikishwaji.

Pia Mkuu wa Wilaya amewataka Watendaji hao kutoa huduma bora kwa wananchi, ikiwemo kuwasomea taarifa za mapato na matumizi, pamoja na kutenga muda maalum wa kuwasikiliza ili kubaini na kutatua changamoto zinazowakabili.

Katika hatua nyingine, Mhe. Manase amewaagiza Watendaji wa Kata na Vijiji kuhakikisha wanasimamia, wanakusanya na kulinda vyanzo vyote vya mapato ya Halmashauri, kwa kuwa mapato hayo yana mchango mkubwa katika utekelezaji wa miradi ya maendeleo.

Akizungumzia mikopo ya 10% inayotolewa na Halmashauri kwa wanawake, vijana na watu wenye ulemavu, Mkuu wa Wilaya amesema kila mwananchi ana haki ya kufaidika na mikopo hiyo. Ameelekeza viongozi wa Kata kuhakikisha wanatoa taarifa mapema kwa wananchi pindi dirisha la uombaji wa mkopo litakapofunguliwa ili kuongeza ushiriki wa wanufaika.