DC KYELA MHE. JOSPHINE MANASE AMEFUNGUA MAFUNZO YA KUONGEZA VIRUTUBISHI KWENYE UNGA WA MAHINDI ILI KUEPUKANA NA UPUNGUFU WA VIINI LISHE MUHIMU KWENYE JAMII ZETU.

Imewekwa Kwenye: September 16th, 2025

Mkuu wa Wilaya ya Kyela Mhr.Josephine Manase amefungua mafunzo ya kuongeza virutubishi kwenye unga wa mahindi tarehe 16.9.2025 katika ukumbi wa mikutano wa Halmashauri.

Akizungumza na wadau wa Lishe katika ufunguzi wa mafunzo hayo Mhe. Manase  amesema mafunzo haya yanalenga kuleta uelewa kuhusu Sheria mpya za viwango zilizotolewa na Serikali tarehe 15.11.2024  juu ya ufafanuzi  wa kanuni za uongezaji wa virutubishi kwenye chakula.

Aidha Mhe.Manase amewataka wadau wote wa Lishe kuwa na ushirikiano kati yao na kuwa mabalozi wazuri, hivyo wanapaswa kuzingatia utekelezaji wa Sheria zote uongezaji wa virutubishi kwenye chakula ili kuepukana na upungufu wa viini Lishe muhimu kwenye jamii zetu.

Akiendelea kusisitiza umuhimu wa Lishe shuleni Mhe.Manase amesema ni muhimu kwa kila mwanafunzi kupata chakula cha mchana awapo Shuleni hivyo amewataka walimu  kuweka mikakati na ajenda za kudumu  juu ya kutoa Elimu kwa Wazazi kuhusu Lishe ili waweze kutoa mchango wa chakula.