DC MANASE ASISITIZA WANANCHI KUTUMIA NISHATI SAFI

Imewekwa Kwenye: August 11th, 2025

Mkuu wa Wilaya ya Kyela Mhe.Josephine Manase amefanya ziara ya kusikiliza na kutatua kero mbalimbali za Wananchi wa Kijiji cha  Mabunga kata ya Ipinda tarehe 11.8.2025

Akitatua changamoto ya kushuka kwa bei ya zao la kokoa Mhe.Manase amesema kokoa inauzwa kwa njia ya mnada kupitia soko la dunia, hivyo bei inapangwa kulingana na uzalishaji na uhitaji, pia amewaasa viongozi wa vyama vya ushirika (AMCOS )  kutojihusisha na masuala ya wizi wa zao la kokoa kwa yeyote atakae bainika  hatua kali za kisheria zitachukuliwa.

Kuhusiana na changamoto  ya uharibifu wa Miundombinu Mhe.Manase ameipongeza Ofisi ya Mkurugenzi wa Halmashauri kwa kununua mitambo ya kutengeneza barabara itakayosaidia  kutatua baadhi ya changamoto za barabara hasa wakati wa mvua.

Aidha Mkuu wa Wilaya amewataka Wazazi kuunga mkono sera ya Elimu bure inayotolewa na Serikali ya awamu ya sita inayoingozwa na Mhe.Dkt Samia Suluhu Hassan kwa kutoa mchango wa chakula shuleni  ili kuwatengenezea watoto Afya ya mwili na akili pamoja na kujenga ushirikiano mzuri baina yao.

akisisitiza matumizi ya nishati safi Mhe. Manase amesema mpango wa Serikali ni kupeleka umeme kwenye vijiji na vitongoji hivyo mpango huo utasaidia Wananchi kuacha matumizi ya nishati chafu na kutumia nishati mbadala.

Kuelekea katika kipindi cha uchaguzi Mhe.Mkuu wa Wilaya ya Kyela amewataka wananchi kujiepusha na masuala mbalimbali yatakayochochea vurugu kwenye jamii,na kuwataka kudumisha na kuendeleza  amani iliyopo Nchini