KAMATI YA KUDUMU YA BUNGE YAPONGEZA USIMAMIZI MZURI WA MRADI WA JENGO LA MAMA NA MTOTO KATIKA HOSPITALI YA WILAYA YA KYELA

Imewekwa Kwenye: March 20th, 2025

Kamati ya kudumu ya Bunge ya Hesabu za Serikali za Mitaa (LAAC) chini ya Mwenyekiti wake Mhe. Halima Mdee imefanya ziara ya kukagua Miradi ya maendeleo ndani ya Halmashauri ya Wilaya ya Kyela ambayo ni mradi wa Shule ya Sekondari ya wasichana Mbeya Girls, pamoja na jengo la Mama na Mtoto katika Hospitali ya Wilaya ya Kyela tarehe 20.03.2025.

Akikagua miradi hiyo Mwenyekiti wa Kamati ya Bunge Mhe.Halima Mdee amemtaka Mkurugenzi Mtendaji aendelee kusimamia  vizuri fedha zinazoletwa na Serikali kwa ajili ya utekelezaji wa miradi mbalimbali ya maendeleo ili iweze kunufaisha kila Mwananchi.

Mhe. Mdee ameitaka Ofisi ya Mkurugenzi  kusimamia Miradi  ya maendeleo kwa weredi  mkubwa  ili  kuifanya Miradi hiyo  iwe na ubora zaidi.

Naye, Naibu Waziri wa Ofisi ya Rais- TAMISEMI, Mhe.Dkt Festo Dugange ameiagiza ofisi ya Mkurugenzi Mtendaji kufuata maelekezo yote waliyopewa na kamati hiyo juu ya miradi iliyokaguliwa.

Sambamba na hilo Mhe. Dkt Dugange amelitaka Baraza la Madiwani kuimarisha ushirikiano uliyopo na Wataalamu kutoka Ofisi ya Mkurugenzi ili kuhakikisha Fedha za Miradi ya maendeleo zinatumika ipasavyo na Miradi inakamilika kwa Wakati uliokusudiwa.

Aidha Kamati hiyo ya Bunge imeridhishwa na utekelezaji wa miradi ya maendeleo kwa kuzingatia ubora katika Halmashauri ya Wilaya ya Kyela ukiwemo mradi wa jengo la mama na mtoto.

Awali Mkuu wa Wilaya ya Kyela Mhe.Josphine Manase amesema  maelekezo yote ya kamati yatafanyiwa kazi na kuhakikisha fedha zinazotolewa na Serikali ya awamu ya sita kwa ajili ya utekelezaji wa miradi zinatumika  ipasavyo.