Makamu Mwenyekiti Wa Mamlaka Ya Mji Mdogo Wa Kyela Apongeza Ushirikiano Baina Ya Viongozi Wataalam Wa Mamlaka

Imewekwa Kwenye: May 3rd, 2023

Makamu mwenyekiti wa Baraza la Mamlaka ya Mji mdogo wa Kyela Mheshimiwa Michael Mwakibinga, amewapongeza viongozi na wataalam wa Mamlaka hiyo kwa kuwa na upendo na ushirikiano unaopelekea Mamlaka ya Mji mdogo kusonga mbele katika kuwaletea wananchi maendeleo.

Pongezi hizo zimetolewa na Makamu Mwenyekiti wa Mamlaka hiyo, alipokuwa akiwasilisha taarifa yake ya utekelezaji wa kazi mbalimbali zilizofanywa na Baraza hilo, taarifa iliyotolewa katika kikao cha Baraza la Mamlaka ya mji mdogo wa Kyela, kilichofanyika   tarehe 02/05/2023 katika ukumbi wa mamlaka hiyo.

Pamoja na pongezi hizo Mhe. Mwakibinga amewashauri wajumbe wa baraza hilo, kuendelea kuudumisha ushirikiano huo, kwani matunda yameonekana.

" Tupeane taarifa mapema zinapojitokeza changamoto hasa taarifa za changamoto katika ukusanyaji wa mapato ili kuzitatua mapema." Amesema Mhe. Michael.

Aidha Makamu mwenyekiti amesema, kwa robo hii ya 3 Mamlaka ya Mji Mdogo wa Kyela imeweza kutekeleza miradi ifuatayo;

Ukarabati wa stendi kuu ya Mabasi Kyela mjini, Ukarabati wa machinjio katika kata ya mikoroshini, Ujenzi wa makaravati, Ujenzi wa zahanati ya Ndandaro pamoja na ununuzi wa Mashine za kukusanyia mapato " POS", ambapo zaidi ya shilingi 101,000,000/= zimetumika.

Awali Mtendaji Mkuu wa Mamlaka ya Mji Mdogo wa Kyela ndugu Gerald Mlelwa amewakumbusha wajumbe wa baraza hilo, kuzisimamia sheria za utunzaji wa mazingira ikiwa ni pamoja na kutoa elimu kwa wananchi kuacha tabia ya kuiachia mifugo kuzurula hovyo mtaani.

Kwani kwa kuiachia mifugo hiyo, imekuwa ni chanzo cha ajari na uchafuzi wa mazingira, Pia amewaomba viongozi hao kusaidiana katika kutoa na kuzuia upandaji wa mazao yanayozidi futi 3 urefu kwenda juu katika maeneo yote ya Mamlaka.