Mheshimiwa Mbunge Wa Jimbo La Kyela Afanya Kikao Na Watumishi

Imewekwa Kwenye: December 15th, 2020

Mbunge wa  Kyela kupitia tiketi ya Chama Cha Mapinduzi (CCM) Mhe. Ally Jumbe Mlaghila amefanya kikao kazi na watumishi (wakuu wa idara na vitengo) wa halmashuri ya wilaya ya Kyela tarehe 15/12/2020. lengo la kufanya kikao hicho ni kupata taarifa za utekelezaji wa majukumu kwa kila idara na vitengo.

Akizungumza na watumishi hao Mhe. Mbunge amesema, amelazimika kufanya kikao hicho kwa kuwa inampasa kufahamu shughuli zote zinazofanywa na Idara pamoja na vitengo vyote ili kuweza kujua wapi aanzie kutekeleza majukumu yake. Ikiwa ni pamoja na kuipeleka Kyela Mbele kwa maendeleo.

Aidha Mheshimiwa Mbunge amewataka wakuu wa Idara na vitengo kumtumia katika kipindi hiki wakati yupo madarakani. Amesema yeye, Mkurugenzi mtendaji wa wilaya pamoja na mwenyekiti wa halmashauri, wamejipanga kuiondoa Kyela mahali ilipo sasa na kuifanya kuwa ya tofauti kimaendeleo.

Ikiwa kama yeye ni msimamizi wa kutekeleza ilani na watalaam ndio watekelezaji wa ilani, amewasihi kufanya kazi wakijiamini kwani kwa kipindi hiki hakuna mfanyakazi atakaenyanyaswa na mtu yeyote.

Kwa upande wake mwenyekiti wa halmashauri ya Kyela Mhe. Katule Kingamkono, amewaasa watumishi kufanya kazi kwa amani ,ila wasijaribu kuomba au kupokea rushwa wala kutumia hovyo pesa za serikali, kwani kwa mtumishi atakaefanya hivyo hatavumiliwa. Pia aliwataka watumishi kupendana wao kwa wao katika kutekeleza majukumu yao.

Aidha Mkurugenzi Mtendaji wa halmashauri ya Kyela ndugu Ezekiel H.Magehema,  aliwapongeza viongozi wote waliohudhuria katika kikao hicho na kuwaahidi kufanya kazi kwa bidii ili kuwaletea maendeleo wananchi wa Kyela na Tanzania kwa ujumla.

Mwisho wakuu wa Idara na vutengo walitoa taarifa zao kwa viongozi kusema hali halisi ya utendaji kazi katika Idara na vitengi vyao.