MKUTANO WA MWAKA WA IDARA YA AFYA NA LISHE WAFANYIKA WILAYANI KYELA

Imewekwa Kwenye: August 1st, 2025

Mkuu wa Wilaya ya Kyela Mhe.Josephine Manase ameongoza mkutano wa mwaka wa Idara ya  Afya na Lishe katika ukumbi wa Palazo uliopo Kata ya Matema tarehe 31.7.2025.

Lengo la mkutano huo ni kufanya tathimini ya kazi Kwa mwaka uliopita,kuonesha mafanikio na changamoto zilizopatikana pamoja na kuweka mikakati ya kuboresha huduma za Afya na kuhakikisha mwananchi anapata huduma bora.

Mkutano huo umeambatana na ugawaji tuzo kwa viongozi wa Afya, Kata zilizofanya vizuri katika usafi, vituo vya afya vilivyofanya vizuri kwenye afua za Afya pamoja na kutoa shukrani kwa wadau mbalimbali wa Afya.

Akifungua mkutano  Mhe .Manase ,amemshukuru Rais wa Jamhuri ya Muungano wa Tanzania Dkt Samia Suluhu Hassan kwa kuboresha miundombinu ya Afya, kama ujenzi wa zahanati na vituo vya afya  ili kuhakikisha  Wananchi wanapata huduma ya Afya wakati wowote.

Sambamba na hayo Mkuu wa Wilaya amewataka viongozi ngazi ya Kata  kutoa Elimu kwa Wananchi juu ya  umuhimu wa vyoo na namna ya kujikinga na magonjwa ya mlipuko pamoja na kutoa takwimu  za usafi wa mazingira kwa wataalamu wa Afya.

Mhe.Manase amewaasa wafawidhi kutumia mfumo tangu anapofika mgonjwa kutibiwa hadi mwisho wa Matibabu yake, pia amewaagiza wafawidhi hao kuwa ifikapo tarehe 30/08/2025 wote wawe wanatumia Mfumo katika kutoa huduma za Matibabu.