Msafara Wa Mkuu Wa Wilaya Kyela Wavamiwa-Mwenyekiti Mh. Hunter Mwakifuna

Imewekwa Kwenye: September 30th, 2019

Haya yamesemwa na mwenyekiti wa halmashauri wa wilaya ya kyela mhe. Hunter  mwakifuna katika kikao cha waandishi wa habari katika ofisi ya  mkurungenzi mtendaji  wilaya ya kyela tarehe 29.08.2019, majira ya saa 11:oo asubuhi siku ya alhamisi.

Kutokana na tukio lililofanywa na vijana  katika Kata ya Makwale, kijiji cha Mpunguti  siku ya jumatano, tarehe  28,08,2019,majira ya saa 5:15 jioni. Vijana ambao walikuwa wanapinga kuzikwa kwa kijana mwenzao aliyejulikana  kwa jina la Richard Kamunyoge, aliyefariki ghafla wakati akicheza mpira  na kuamini kuwa amekufa kwa imani za kishirikina ( kurogwa) ndio walisababisha uvamizi huo.

Mwenyekiti mh. Hunter Mwakifuna amesema  vijana hao  walivalia Tisheti za rangi nyekundu walivamia Msafara  wa mkuu wa wilaya  mhe. Claudia Kitta, akitoka kukagua baadhi ya miradi ukiwepo mradi wa barabara ya Matema. Vijana kwa kuhofia  kwa mhe. Claudia kitta kuwaingilia maamuzi yao ya kupinga kuzikwa kwa mwenzao  mpaka uchunguzi ufanyike ndipo walipoamua  kuziba barabara na kuanza kushambulia msafara kwa mawe.

Pia mwenyekiti Hunter Mwakifuna amesema kutokana na tukio hilo maafisa usalama wawili walipata majeraha kadhaa, lakini Mhe. Claudia Kitta alifanikiwa kuondoka salama katika tukio hilo. Mpaka sasa watu 45 wanashikiliwa na polisi kwa uchunguzi zaidi.

Aidha mkurungenzi mtendaji Mhe. Polycarp Benedict Ntapanya, amekemea vikali juu ya tukio hilo, amewasisitizia wananchi wa Wilaya ya Kyela kuwa watulivu na kuendelea na shughuli zao kama kawaida kwani ulinzi na usalama umeimarishwa pande zote.